Nairobi,(insidesomalia.org)- Gudoomiyaha Isbaheysiga Dib u Xoreynta Sheekh Shariif Sheekh Axmed ayaa ka hadlay Burcad badeedka Soomaalida ee ku xoogeysanaya Xeebaha Soomaaliya, isagoona wax laga xumaado ku tilmaamay afduubka ay ku heystaan dhowr Maraakiib oo laga leeyahay dalal shisheeye.

Isagoo warbaahinta la hadlayay ayuu sheekhu sheegay in isbaheysigiisu uu wado qorshayaal lagaga hortagayo Kooxaha Burcad badeedka, si buu yiri lagu soo afjaro dhibaatooyinka loo geysanayo Maraakiibta sida kuwa gar gaarka sida.

Inkastoo qorshayaashaasi nooca ay yihiin uusan sheegin Sheekh Shariif, haddana waxa uu xusay in hadda ka hor Maxkamadaha Islaamiga xiligii lixda Bilood ay wax ka qabteen iyagoo la dagaalamay.

Waxa uu sheegay in wax laga qaban karo kooxaha geysanaya falalka burcadbadeeda, isagoo sheegay in la garanayo dadka burcad badeeda geysanaya.

Aragti ahaantiisa wuxuu sheegay in burcad badeedu ay ka daran tahay sidii waagii hore oo ay hadda abaabulan tahay, isagoona soo hadal qaaday inay ku lug leeyihiin afduubka Rag siyaasiyiin ah.

Hadalkan wadaadkan qunyar socodka ah ayaa ku soo aadaya, xilli Deegaanka EYL ee Puntland lagu heysto Ilaa 10 Markab, isla markaana lala heysto shaqaalo la socda oo gaaraya 130 ruux oo u dhashay dalal kala duwan.